Bata nalumos sa drum

CEBU, Philippines - Patay ang   duha pa ka tuig nga batang lalaki human kini maugbok sa gamay nga drum nga dunay sulod nga tubig niadtong Biyernes sa buntag diha sa ilang balay sa barangay Tayud, lungsod sa Consolacion.

Ang biktitmang si Lee Angelo Curitana, residente sa maong dapit kinsa giingong milagom na ug wala na makaabot nga buhi sa Eversely Hospital sa dakbayan sa Mandaue.

Ang maong bata gikatahong anak sa Field Training Police (FTP) nga si PO1 Joel Curitana sumala pa sa hepe sa kapolisan sa Consolacion nga si Chief Inspector Wilbert Parilla.

Si PO1 Harley Itang, duty desk officer sa Consolacion Police Station sa pakighinabi niini sa Banat News kagahapon mibutyag nga base sa imbestigasyon ni PO1 Melanio Gabayan nga sa wala pa mahitabo ang insidente ang bata ug ang maguwang niining lalaki maoy nagduwaduwa diha gawas sa ilang balay.

Ang nagbantay sa duha mao ang ilang apohan nga si Lourdes Judaya kinsa niadtong higayona nangutaw diha sulod sa balay.

Dihang migawas ang apohan mao na lay nakita niini ang iyang duha ka tuig nga apo nga naugbok na ang ulo sulod sa drum nga dunay tubig hinungdan nga nalumos kini ug namatay.

Ang mga ginikanan sa mga bata parehong nagtrabaho niadtong higayona.

Si Parilla sa iyang bahin, nagkanayon nga angayan gyud untang bantayan ang mga bata ilabi na sa samang pangidaron nga bantayonon pa kaayo.

Midugang kini nga ang mga ginikanan sa bata dili liable o walay tulobagon sa insidente. - Brenda D. Batuto uban sa report ni Niña G. Sumacot sa The Freeman/EIM (FREEMAN)