Nahilo sa isdang 'dalapugan' patay

CEBU, Philippines - Namatay ang usa ka mag-uuma human kini mahilo sa isdang “dalapugan” nga ilang gisud-an sa panihapon didto sa bukirang bahin sa barangay Canasaloay lungsod sa Oslob niadtong Martes sa alas 8:00 sa gabii apan niadtong Miyerkules na sa hapon na-report sa buhatan sa kapulisan.

Giingong dead on arrival sa Oslob District Hospital si Epitacio Sanchez Perolino, 37, nagpuyo sa maong lugar nga usa ka mag-uuma. Matud ni PO1 Carmelito Dacula sa Oslob Police Station dihang nahinabi sa Banat News ang paryente sa namatay nga si Max Pelosopo, 35, maoy mipalit sa maong isda sa merkado sa lungsod.

Giingong gisud-an nila kini uban sa biktima ug ang asawa niini nga si Angelita Perolino, 32, ug ugangan nga si Juanita Estinor, 62.

Sumala pa nga dangtan napulo ka minutos pagkahuman nila manihapon kalit silang gibati og pagsakit sa tiyan. Gikataho nga ang namatay maoy mikaon sa ginhawaan sa maong isda nga giapil sa pagluto. Tungod sa ilang gipamati ug sa grabeng kapaspas nga pagkaluya sa namatay dali nila kining gitabang ug gidala sa Oslob District Hospital apan namatay gyud kini pag-abot sa maong tambalanan mga alas 8:00 sa gabii.

Ang sobra sa maong isda nga ilang gisud-an gikuha na sa kapulisan ug gitugyan sa Municipal Health officer nga si Dr. Arnel Samson alang sa laboratory examination pagtino kun mao ba gyud kini nakaingon sa pagkahilo sa maong mag-uuma. (BANAT NEWS)