Petisyon nga himuong P6.50 ang pletihan gisumitir

CEBU, Philippines - Usa ka kahugpongan sa mga kunsumidor pormal na nga nisumiter kagahapon sa hapon diha sa buhatan sa Land Transportation Franchising and Regulatory Board-7 sa ilang petisyon nga paubsan og P1.50 ang minimum nga plitehan.

“I am very positive nga aksyonan dayon ni sa LTFRB,” matud pa ni Vicente Sapio, presidente sa Consumers Rights and Economic Welfare (CREW). Ang maong petisyon adunay pirma sa sobra 2,000 ka miyembro sa CREW, apan matud pang Sapio, daghan pa nilang mga miyembro nga mipadayag sa ilang suporta sa maong lakang pinaagi sa e-mail.

Ang maong petisyon pormal nga nadawat sa LTFRB 7 ala- una sa hapon kagahapon ug nanghinaot si Sapio uban sa iyang mga miyembro nga kahatagan dayon og higayon sa maong ahensiya nga matuki ang ilang hangyo kay matud pa niya para kini sa kaayohan sa tanan.

Malaumon ang presidente sa CREW nga ihatag sa LTFRB ang P1.50 nga pagpaubos sa plitehan sa pampublikong sakyanan sama sa jeep, gikan sa P8 mamahimo na unya kining P6.50. Dili pa lang dugay mimando ang LTFRB nga paubsan og P.50 gikan sa P8 nga minimum ang pletihan apan kadaghanan sa mga pasaheroang jeepneys sa Metro Cebu wala motuman niini og padayong naningil og P8.

Matud pa ni Sapio, ang presyo sa unleaded gasoline, gikan sa P56 matag litro sa miaging pipila ka buwan, minaug na kini og P45. Busa, sakto lang nga ipahamtang pud ang ubos nga plite, matud pa niya.

“Taud-taud na pud nga miubos ang presyo sa gasoline, so fair lang nga ipaubos na pud ang plitehan,” niya pa. (BANAT NEWS)