Sa kasaysayan karon

Pygmy mammoth

CEBU, Philippines - 1994—Napalgan ang labing una ug kompletong bukog sa gituohang pandak nga mammoth (gituohang mga mananap diin maggikan ang mga elepante karon) diha sa nagkaanam og kahugmak nga pangpang sa Santa Rosa Island usa sa mga isla sa Channel Islands sa California, USA. Mao pa kini ang nadiskubrehang bukog sa usa ka mananap nga kompleto ug gituohan base sa paghiling nabuhi kini 12,840 ka tuig na ang nakalabay. Ang maong bukog may gitas-on lamang nga 5-1/2 feet, ug nagtimbang og usa ka tonelada. Gituohang nabuhi sila niadtong Pleistocene-era gibanabanang 2,588,000 ngadto sa 11,700 ka tuig na ang nakalabay diin usab gituohang nagsugod ang ebolusyon sa mga gituohang unang tawo nga gitawag og Neanderthals ngadto na sa pagka Homo erectus.

Evita Peron

1974 – Nakalingkod isip labing unang babayeng pangulo sa Western Hemisphere nga si Presidente Isabela Peron nga mas nahimong popular sa angga nga Evita. Si Evita mao ang ikatulong napangasawa sa kanhi pangulo sa Argentina nga si Juan Peron. Nahimong presidente si Evita human mamatay si Juan. Ilawom sa pamunoan ni Evita wala niya masulbad ang mga problema sa ilang nasud tungod sa kapakyas paghulma og lig-ong gobiyerno hinungdan sa nahitabong kudeta niadtong 1976 nga miresulta sa iyang pagkabilanggo sulod sa lima ka tuig tungod sa pasangil nga nag-abusar kini sa iyang gahom. Human siya makagawas sa bilanggoan niadtong 1981 mibalhin siya og puyo sa Madrid.

1989— Mipahamtang og silot sa ekonomikanhong paagi ang Kongreso sa Estados Unidos batok sa nasud sa China human sa nahitabong Tiananmen Square Massacre. Daan nang aslom og tinagdanay ang US ug China niadto pang cold war apan nagrabehan kini human sa maong masaker nga nahitabo niadtong Abril 15, 1989. Ang China ilawom kaniadto sa pamunoan ni Deng Xiaopeng nga mitalikod na sa Maoist-style nga panggobiyerno ug gipili ang mga panggobiyernong mas luag ug mopatuman og repormang maoy nakapalambo sa ilang nasud karon. Natapos ang protesta sa mga estudyante niadtong Hunyo 4 pinaagi sa paggamit sa pwersa militar. (BANAT NEWS)