CEBU, Philippines - Si Mayor Aurelio Espinosa sa dakbayan sa Toledo kinsa kaalyado sa One Cebu mibutyag nga giagni siya sa Liberal Party nga matapon sa maong partido ug siya maoy ituboy nga modagan isip Kongresista sa ika-tulong distrito.
Si Espinosa nga nahinabi sa mga tigbalita kagahapon mibutyag nga ang grupo ni Hilario “Jun-Jun” Davide III nagpunay og tawag kaniya diin giagni siyang makig-alyado sa LP ug siya maoy padaganong kongresista sa partido.
Matud sa mayor nga iyahang gihangyo ang LP nga hatagan lang siya og hustong panahon tungod kay ang iyang mga anak ubos kini sa landong sa One Cebu apan matud usab ni Espinosa nga maghuwat lang siya sa saktong panahon. Wala hinuoy kompirmasyon gikan sa LP bahin sa maong giingong pagtawag ni Davide kang Espinosa.
Si Espinosa aduna pay nahibiling duha ka termino sa pagdagan isip mayor sa siyudad ug matud usab niya nga magpapili siya pag-usab isip mayor sa ilang siyudad sa umaabot eleksiyon sa sunod tuig.
Giklaro ni Espinosa nga wala siya’y planong modagan isip kongresista tungod kay daghan pa siyang angayang himuon sa Toledo. Sa laing bahin, ang mayor nagkanayon nga wala siya mahulga sa giingong planong pagdagan isip mayor sa Toledo ni kanhi Senador Sonny Osmeña kinsa sakop sa LP. Gibutyag ni Espinosa nga sila kanhi kaalyado ni Osmeña. Si Espinosa kinsa nagpakita sa iyang pagkakampanti nagkanayon kini nga ang mga tawo naanad na nila ug maglisod ang mga tawo nga modagan nga dili taga Toledo. (BANAT NEWS)