Masyador gipusil patay sa wa ilhing kriminal

CEBU, Philippines - Nabuslot ang bagol-bagol sa usa ka masyador human kini pusila patay sa wala hiilhing kriminal didto sa bakanting luna sa barangay Tungkop lungsod sa Minglanilla sa miaging gabii ug kagahapon pa sa buntag maugkat.

Ang biktima mao si Jorge Baoy, 37, nga taga Lutopan siyudad sa Toledo.

Sa pakighinabi sa Banat News ni PO2 Nikki Carlo Plarisan sa Minglanilla Police Station nasayran nga base sa pamahayag sa mga saksi nga ilang nakit-an ang motorsiklo sa biktima nga giparking dapit sa usa ka bakanting luna diin siya patya.

Samtang kagahapon sa pagka- ala 1:00 ang takna sa kaadlawon, tulo ka motorsiklo ang gisunog sa bukirang bahin sa barangay Campo 7, Minglanilla.

Ang mga nasunog mao ang motorsiklo nila ni Ferdinand Cañedo nga adunay plakang YV-1710, Edward dela Torre may plakang 1467-UE ug Ram dela Torre nga may plakang 9111-IP.

Ang kapolisan wala pay kasayoran sa hinungdan sa pagsunog sa maong mga sakyanan ug si kinsa usab ang miamong-among niini.

Samtang si Chief Inspector Timar Alam, hepe sa Minglanilla Police Station mibutyag sa Banat News nga gipaubos  pa nila karon sa imbistigasyon ang kamatayon ni Baoy.

Ilang sutaon ang nagkalainlaing anggolo sama sa utang, dumot o kaha paregla.

Kun nganong nahiabot kini didto sa Tungkop, usa usab sa mga butang nga sutaon sa kapolisan.

Gitan-aw usab ni Alam ang posibilidad nga may kalambigitan sa drugas ang kamatayon sa biktima apan iyang gisalikway nga may kalambigitan ang pagsunog sa   tulo ka motorsiklo sa nahitabong pagpamusil sa biktima. (Lesley Caminade-Vestil/WC)

Nagtaod og suga nakuryentihan patay

Nila ni Romeo T. Limpangog ug Bong Soriano

Namatay ang usa ka tawo nga gituohang nakuryentihan sa sulod sa iyang gipuy-an sa Agosto Compound sa barangay Mactan, dakbayan sa Lapulapu sa miaging gabii.

Ang biktima mao si Linardo Encinareal, 34, ulitawo, nga lumad nga taga No. 8 Matimtim, dalan B. Luna sa dakbayan sa Quezon ug temporaryo nga nagpuyo sa maong dapit.

Si PO2 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga nagtaud ang biktima og bombilya dihang nahikapan niini ang napanit nga linya sa kuryente. Tungod sa pagkisikisi sa biktima dali kining gitabang sa iyang mga kauban sa trabaho   nga sila si Dennis Aldo, Michael Burn ug Joel Logrono nga pulos hingkod.

Ila kining  gihatud ngadto sa Our Lady General Hospital sa barangay Gun-ob sa maong dakbayan apan gideklarar kini sa mga doktor nga dead on arrival. Matud pa ni PO2 Jocotan nga dili pa nila matataw ang hinungdan sa kamatayon sa biktima kun ang kuryente ba nga misulod sa iyang lawas.

Sa pagkakaron padayon pa nilang gihimo ang imbistigasyon matud   pa ni Jocotan. (BANAT NEWS)