Pusher mibakwi sa pasangil nga polis iyang supplier

CEBU, Philippines - Gibakwi sa usa ka dinakpang suspetsado nga drug pusher ang gisulti niya nga usa ka polis ang komprahanan niya og shabu nga iyang gipamaligya sa dakbayan sa Talisay.

Si Albert Salem, alyas Apar ug Migo nadakpan sa kapolisan sa Talisay niadtong Domingo didto sa iyang balay sa sitio Galaxy, barangay Tanke, sa maong dakbayan.

Dihang giimbistigar sa kapolisan kun kinsay tigsuplay kaniya   og shabu, gitug-an ni Salem nga usa ka SPO4 ang ranggo sa komprahan niya og gidiling drugas , apan wala niya ibutyag ang ngalan niini.

Apan kagahapon iya  nang gipanghimakak ang iyang unang pamahayag ug wala na siya moangkon nga namasangil siya og polis nga maoy kuhaanan niya og ilegal nga drugas .

Samtang matud pa ni Supt. Eddie Recamara, hepe sa Talisay City Police Office nga tungod  kay nasuta   nga shabu gyud ang nasakmit nila gikan sa balay ni Salem niadtong Domingo sa kaadlawon, dili kapiyansahan ang kaso niini nga ilang gisang-at kagahapon sa korte.

Kini tungod sa gibug-aton nga 10.5 gramos sa maong shabu, base sa balaod dili na kapiyansahan ang suspetsado ug nagkahulogan kini nga kun magkinaunsa adto siya madugta sa prisohan, matud pa ni Recamara.

Unya gawas sa shabu nasakmit usab sa kapolisan ang usa ka .45 kalibre nga pistola ug magazine niini nga may buhing mga bala. (BANAT NEWS)