Piad di imbistigador sa kaso ni Enas

CEBU, Philippines - Si Supt. Alvin Piad, station chief sa 701st Regional Maritime Unit-7, miklaro nga wala sila tahasi sa pag-imbestigar sa kaso ni Maria Grethel Enas, ang babayeng miambak gikan sa barko sa Cokaliong Shipping Lines (CSL) nga naglawig gikan sa Surigao paingon sa Cebu City sa miaging semana.

Kini tungod kay ang imbistigasyon sa maong kaso gihimo sa Maritime Industry Authority (Marina)-7.

Matud pa ni Piad igo lang sila nga mi-blotter sa maong insidente ug mitabang sa paghimo sa mga dokumento nga gikinahanglan sa biktima sa pag-file sa kaso ngadto sa Marina-7, ug ang maong ahensya mao nay miimbistigar niini.

“We cannot say that the shipping lines (Cokaliong) is liable because we are not the investigating body, it is up to the Marina to determine such,” he said. Si Ma. Gladys Teves, 41, igsoon ni Enas, giingong nasagmuyo sa kahinay sa dagan sa kaso bahin sa kamatayon sa iyang igsoon.

Ang Marina-7 giingong mihangyo na sa tagtungod sa paghatag kanila og 15 ka adlaw sa pag-imbestigar sa maong kaso apan si Teves miingon nga dili na sila kapaabot og dugay sa imbestigasyon kay dili sila taga Cebu.

Matud pa ni Teves gipasa-pasa lang sila sa Marina-7 kung mangutana na sila kabahin sa kaso. Samtang si Chester Cokaliong ang tag-iya sa Cokaliong Shipping nagkanayon nga giatiman pag-ayo sa iyang mga tripolante sa barko si Enas dihang namatikdan kini nga dili na normal ang iyang linihokan sulod sa barko.

Si Cokaliong nga mibisita kagahapon sa buhatan sa The Freeman ug Banat News nagkanayon nga wala gayud silay sala sa nahitabo kang Enas. Gani iyang gibutyag nga gikan pa sa alas 9:00 sa gabii gibantayan sa iyang mga tawo si Enas hangtud sa alas 4:00 sa kaadlawon, didto sa teheras nga gihigdaan niini.

Apan dihang nalipat ang nagbantay kang Enas nianang pagka-alas 4:30 namatikdan sa iyang mga tawo nga kalit lang nawagtang si Enas gikan sa gihigdaan niining teheras hinungdan nga gipangita nila sulod sa usa ka oras ug tunga sulod sa barko, matud pa ni Cokaliong.

Apan gumikan sa kadako sa barko nga may 700 ka pasahero sa maong higayon wala na nila igkita si Enas ug mao nalay nasayran sa mga tripulante nga nakaambak na kini sa dagat.

Si Enas mibiya sa Sugbo paingon sa Dinagat Island Martes sa miaging semana sakay sa M/V Pilipinas Dinagat sa CPL.

Usa siya ka membro sa Philippine Benevolent Missionaries Association, usa ka relihiyosong grupo nga gidumala ni kanhi Congressman sa Dinagat Island Ruben Ecleo Jr. (/WC)(BANAT NEWS)