Bata gidagit sa duha ka babaye

CEBU, Philippines - Usa ka kapin tuig nga batang lalaki ang giingong gidagit kagahapon sulod sa usa ka dakong department store sa downtown area samtang sila namalit og pagkaon.

Midangop sa Investigation and Detective Management Branch (IDMB) sa Cebu City Police Office (CCPO) ang inahan sa bata nga si Diane Simbajon, 21, taga Palanas, Ginatilan, Cebu ug igsuon niining si Gina Pareja aron mosumbong.

Matud sa inahan nga nagpalit siya og pagkaon kilid sa maong department store ug gibilin niya ang iyang anak sa iyang maguwang nga si Pareja apan sa iyang pagbalik wala na ang iyang anak.

Si Pareja nga nahinabi sa Banat News nagkanayon nga samtang nag-akba siya sa iyang pag-umangkon kalit siyang gitawag sa duha ka babaye nga nagkanayon “Te ambi na ang bata, apasa si Diane.”

Matud pa ni Pareja namay-ungan niya ang usa sa mga babaye nga igsuon sa kapuyo ni Diane maong kompiyansa lang siyang mitunol niini sa pag-umangkon ug giapas niya si Diane.

Apan sa dihang ilang gitawgan ang igsuon sa kapuyo ni Diane giingong nasuko hinuon kini kaniya ug gikasab-an sila niini.

Human sa pipila ka oras nga paglibot ug pakyas nga pagpangita sa iyang anak midangop na lang sila sa buhatan ni Chief Insp. Bonifacio Garciano sa IDMB. ( EIM)   - BANAT NEWS