CEBU, Philippines - Nakaangkon og pangos sa lawas ang usa ka polis human kini mabagnos sa karsada samtang nagmaneho sa iyang motorsiklo didto sa barangay Lawaan II, dakbayan sa Talisay, kagahapon sa buntag.
Ang biktima mao si SPO1 Nestor Canlobo kinsa nadestino karon sa mobile patrol sa Talisay City Police Station.
Si Canlobo nagsakay sa iyang motorsiklo paingon sa iyang duty nga alas 4:00 sa hapon ngadto sa alas 12:00 sa tungang gabii dihang misaliring ang iyang motorsiklo sa karsada.
Si Bejay Odilao nga anak ni Konsehal Bernard Odilao ug sakop sa TREAT nga nahinabi sa Banat News mibutyag nga ang maong polis mopaingon unta ngadto sa detention cell sa city hall dihang nasugatan niya ang disgrasya gumikan sa kabatuon ug kalibaongon sa maong lugar.
Matud ni Bejay nga dili hinuon grabe ang naangkong kadaot sa lawas ni Canlobo ug wala na kini magpadala ngadto sa tambalanan apan gihatagan nila kini og first aid.
(BANAT NEWS)