CEBU, Philippines - Nagtibi ang lab-asira human masakiyo sa wala hiilhing mga tulisan ang kuwarta ug mga alahas niini sa tulis nga nahitabo didto sa sitio Libon, barangay Guinsay sa dakbayan sa Danao sa miaging kaadlawon.
Ang biktima mao si Victoria Laurente Yuldan, 48, minyo, nga nagpuyo sa maong dapit.
Matud pa ni P03 Arnold Labine sa kapolisan sa maong dakbayan nga gikan pa sa ilang balay ang biktima ug misakay kini og traysikad paingon sa merkado publiko sa maong dakbayan.
Apan matud pa ni PO3 Labine nga samtang nagdagan ang traysikad kalit nga mibabag niini ang usa ka motorsiklo nga gisakyan sa tulo ka tawo nga armado.
.Sa paghunong sa traysikad nanaug usab dayon ang backrider sa motorsiklo ug miduol sa biktima uban ang pagtion sa armas de fuego niini ug mipahibawo nga tulis.
Unya kay dugay mang mikuot sa iyang bulsa ang biktima gidul-it ang sumbohan sa armas ngadto sa tangkugo sa biktima.
Gumikan sa kabugnaw sa simud sa armas sa tulisan, gitunol nalang sa biktima ang iyang kuwarta nga wala niya maihap uban sa iyang singsing ug ariyos ug cell phone.
Human madawat ang maong mga butang misirit dayon pahilayo sa maong lugar ang mga tulisan.
Sa pagkakaron padayon pang gipangita sa kapolisan ang mga tulisan.
(/WC)(BANAT NEWS)