Shabu pusher natiklo

CEBU, Philippines - Usa ka pusher og shabu kinsa namaligya ug shabu nga kuwang og timbang gisikop sa kapolisan sa dalan Plaridel, sa barangay Paknaan sa dakbayan sa Mandaue sa miaging gabii.

Ang suspetsado mao si Aemando Arnaiz alyas “Madic” 27, minyo, walay trabaho ug nagpuyo sa barangay Tayud sa lungsod sa Consolacion sa lalawigan sa Sugbo.

Si PO3 Eleazar   Llanes sa kapolisan sa Presento 3 sa Mandaue City Police Office (MCP0) nga nagbase sa barangay Basak sa maong dakbayan nga nahinabi sa Banat News miingon nga sa wala pa hidakpi, si Arnaiz   nakiglalis sa usa ka drayber sa habal-habal   nga wala hiilhi sa maong dapit kay mireklamo ang maong drayber sa kagagmay sa putos sa shabu nga gibaligya sa suspetsado.

Maoy hinungdan nga nagdumili siya sa pagpalit sa usa ka paketeng shabu sa suspetsado   kay matud pa gamitoy kaayo ug kuwang sa timbang.

Unya kay nakamatikod man ang drayber nga nagdang-danga ang mga polis sa ilang nahimutangan maoy hinungdan nga misirit kini pahilayo sa maong lugar.

Si P03 Llanes miingon nga nahibilin ang suspek sa maong lugar nga wala makabantay nga nagsingabot nga mga polis.

Apan ang ilang lalis nagsukad dihang gihangyo sa maong drayber og P300 lang matag usa ka putos nga shabu tungod sa pagkakuwang niini  og gidak-on.

Apan wala mosugot si Arnaiz kay matud pa niya tag-P500 gyud ang presyo niini matag pakete nga misangpot sa ilang panaglalis.

Apan nataymingan nga maoy paglabay nagpatrolya nga mga polis busa gisikop   dayon ang suspetsado. (/WC)(BANAT NEWS)