Tulo gipamusil sa siyudad sa Sugbu usa patay

CEBU, Philippines - Usa patay samtang duha niini ang angol sa nahitabong pagpamusil sa dakbayan sa Sugbo sa managlahing oras ug lugar.

Wala na makaabot nga buhi sa tambalanan si Nestor Sentillas, 53, molupyo sa barangay Lorega San Miguel kinsa nakaangkon og samad pinusilan sa nagkadaiyang parte sa iyang lawas.

Sa imbestigasyon sa Homicide Section base sa pamahayag sa asawa sa biktima nga si Jesna nagsakay og motorsiklo ang biktima ug padulong nang mokanaog diha sa atubangan sa ilang balay dihang kalit kining gihunongan sa usa ka motorsiklong dunay duha ka wala mailhing lalaking nagsakay.

Sa kalit lang nagpaka-paka ang buto nga nadunggan sa mga silingan sa biktima ug sa ilang pagsusi nahagba na ang biktima gikan sa iyang motorsiklo nga gimaneho ug naglunang na kini sa kaugalingong dugo. Ang mga mamumuno daling miikyas palayo sa lugar, gisuwayan pa unta pagdala sa Chong Hua Hospital ang biktima apan patay na kini. Sa laing hitabo, sa miaging gabii usa ka Donald Policaiz, 34, nga taga Purok 8, barangay Camputhaw ning dakbayan ang naangol human kini napusilan sa liog ug batiis sa wala mailhing lalaki. Gikatahong naglingkod-lingkod ang biktima sa daplin sa dalan dihang kalit kining giduol sa maong lalaki ug gipusil, human niini daling mikaratel og dagan ang maong lalaki.

Ang biktima gidala sa Cebu Doctors Hospital samtang padayon pang giimbestigar sa kapolisan ang motibo sa krimen.

Samtang sa sayo pa nianang pasado alas-7 sa maiging gabii laing pagpamusil ang nahitabo sa sitio San Miguel barangay Pung-ol Sibugay nga miresulta usab sa pagkaangol ni Jelvin Vasquez, 18.

Si Vasquez naigo sa tiil ug gidala sa Cebu City Medical Center, padayon pa ang kapolisan pag-ila sa mipusil sa biktima kinsa daling nakadagan palayo.

Una pa ang pagpamusil, nagkuyog ang biktima ug ig-agaw nga si Ronald Pador kinsa kalit nga gibunalan og botelya sa usa ka Margarito Rosaldo, tungod niini daling mitabang si Vasquez apan kalit nga may mipusil kaniya. (BANAT NEWS)