BRT anha manukad sa Bulacao ngadto na sa Talamban

CEBU, Philippines - Wala nay angayang kabalak-an ang mga public utility jeepney drivers bisan pa man og tukuron ang giplanong Bus Rapid Transit (BRT) sunod tuig dinhi sa Metro Cebu.

Atol sa gipahigayong press briefing kagahapong adlawa gipasabot ni Colin Brader, ang managing director sa Integrated Transport Planning Ltd.nga walay angayang kabalak-an ang mga drayber tungod kay sila man usab unya ang kuhaon nga mga drayber sa maong mga bus.

Gawas niini, ipaubos pa usab sa seminar ug training ang mga drayber sa BRT kini aron sila mahanas sa pagmaneho og bus.

“Training assistance will be given to them, help them train their skills and help them develop their skills,” pasabot pa ni Brader.

Dugang pa usab niini nga wala silay gipangitang rekisito sa usa ka drayber aron momaneho sa bus ang ilang gipangita nga nakahibalo lang sa luwas nga pagmaneho.

“They might not be good at this moment, it does not mean they can’t drive well,” butyag pa ni Brader.

Gipasabot usab ni Brader nga daghan og matipig nga oras kun ipatuman na ang BRT sunod tuig kompara sa jeepney nga magsige og hunong aron mopakanaog ug mo-pickup og pasahero.

Samtang gipasalig niya nga di makamugna og trapiko ang BRT tungod kay duna kini sistemang sundon sama sa tukmang oras sa paglarga ug kung asa lang mohunong.

Gawas pa niini, makatabang usab sa panglawas sa mga sumasakay ang paglakaw nila padulong sa mga BRT terminals. “ It’s a little bit of walking but it can help a healthy lifestyle, its exercising,” matud pa ni Brader. Ang BRT project giplanohang motukod og 14 terminals gikan sa Bulacao ngadto na sa Ayala Business Center lahos sa Talamban area.

Gawas sa dakbayan sa Sugbo, nagplano usab ang grupo ni Brader nga ipatuman ang BRT gikan sa South Road Properties, patubang sa North Reclamation Area nga moagi sa syudad sa Mandaue lusot na ngadto sa dakbayan sa Lapulapu.

Apan giklaro ni Brader nga ila unang unahon sa pagpatuman ang maong proyekto sa dakbayan sa Sugbo. Samtang si Mayor Michael Rama miingon nga dakong hagit sa Sugbu ang katumanan sa BRT nga naglakip unya sa bagulbol sa mga jeepney drivers.

“ The issue about drivers, social impact but the consultants are very much aware about it and they’ll be spending more time attending to bringing people to understand,” matud pa sa mayor.

Matud pa ni Rama ilaha karon tun-an og maayo ang proposal sa BRT. Aduna nay nagpadayong feasibility study kabahin niini ug gikatakdang mahuman kini karung umaabot buwan sa Agosto.

Human niini kun mauyonan sa tanan sugdan na ang konstruksyon sa mga terminals ug pasilidad alang niini karong Oktubre sa sunod tuig ug gipaabot nga magsugod kini og operate karong 2015.

Ang maong pre-feasibility study gihimo sa National Economic Development Authority (NEDA), Department of Transportation and Communication (DOTC), Department of Public Works and Highways(DPWH) ug Cebu City Government.  (BANAT NEWS)