CEBU, Philippines - Misaad si Kongresista Tomas Osmeña sa habagatang distrito sa dakbayan sa Sugbo nga himoon niyang P10 mil ang benepisyo sa matag senior citizen matag tuig kun pilion siyang mayor sa katawhan ning dakbayan sa umaabot nga election sa sunod tuig.
Sa samang higayon mohatag siya og tag P25 mil matag semester sa matag estudyante nga scholar sa kagamhanan sa dakbayan kun modaug siya sa piniliay sa tuig 2013.
Ang maong pasalig gihimo ni Osmeña atol sa induction sa mga opisyal sa bag-ong natukod nga Cebu City Senior Citizens Alliance (CCSCA) kansang presidente mao si Engr. Edgar Batiquin, didto sa Grand Convention Center sa barangay Banilad ning dakbayan sa Sugbo.
Matud pa ni Osmeña nga daghan pa siyang gilaraw nga kaayohan alang sa dakbayan sa Sugbo nga iya nang gilantaw nga matuman sa umaabot nga katuigan.
Usa sa iyang mga plano mao nga dili na ipaagi sa Cebu City Medical Center ang gahin alang sa mga medisina.
Ang iyang buhaton kun siya maoy mayor adto niya ibundak sa tagsa-tagsa ka barangay health center ang mga tambal aron kutob sa pasyente sa CCMC adto na motunol sa ilang mga resita sa ilang barangay kapitan.
Sa pagkakaron nasuta sa kongresista sa amihanang distrito sa dakbayan sa Sugbo nga sa P280 milyones nga gigahin sa City Hall matag tuig sa CCMC, ultimong gapas ug tambal sa gagmay samad walay ikahatag ang maong tambalanan.
Samtang sa laing bahin ang CCSCA misaad nga suportahan nila si Osmeña sa tinguha nga matuman kining tanan niyang mga laraw alang sa kaayohan sa mga molupyo sa dakbayan sa Sugbo.
Si Osmeña sa mayor pa maoy nagpasiugda sa paghatag og tag P2 mil matag birthday sa senior citizen nga botante sa dakbayan sa Sugbo ug laing P2 mil sa panahon sa Pasko kun Christmas gift.
Niining tuiga sa unang higayon ubos sa pamunoan ni Mayor Michael Rama gihimo na nga P3 mil matag birthday sa senior citizen ug laing P3 mil usab unya sa Disyembre.(/WC) (BANAT NEWS)