Rama di kinahanglang mananghid sa konseho

CEBU, Philippines - Gitataw ni Mayor Michael Rama nga dili na kinahanglang mangayo siya og go- signal sa konseho kung may pasakaan siya og kaso sa korte sanglit iya kining katungod isip chief executive sa siyudad sa Sugbo.

Ang maong pamahayag gihimo ni Rama human kuwestiyona sa konseho sa dakbayan ang iyang pagkiha kang Department of Finance Secretary Cesar Purisima gumikan sa pagrelibo niini ni City Treasurer Ofelia Oliva nga wala magpahibawo kaniya.

Gihulagway ni Rama nga usa ka matang sa pangabuso sa iyang hukom ang nahimo ni Purisima busa gusto niyang iya kining kuwestiyonon didto sa korte. Apan mihiwasa ang mga konsehal nga iyang kontra ug mipasar kini og resolusyon sa pagsupak nila sa iyang (Rama) gibuhat kay dili na usab sila gusto nga magpabilin pa sa puwesto si Oliva.

Gusto gyud sa konseho nga bisan mayor si Rama , kinahanglang mosaludo siya ug moduko sa mga konsehal ug mananghid sa matag lakang nga himoon niini ilabi na sa iyang decision making.  (BANAT NEWS)