CEBU, Philippines - Patay ang usa ka panday human kini madasmagi sa trak de karga samtang nagmaneho sa iyang biseklita didto sa barangay Tutay lungsod sa Pinamungajan niadtong Biyernes sa hapon.
Ang biktima mao si Arresto Moreno, 48 , minyo , nga taga barangay Pandakan, sa maong lungsod , kinsa usa ka panday.
Samtang ang nakadasmag niya mao ang usa ka close van nga kolor puti nga gipanag-iya sa Maridan Company ug gimaneho ni Rommy Aroza, 39, minyo, nga taga Pooc, siyudad sa Talisay.
Si PO1 Froilan Velasquez sa Pinamungajan Police Station mibutyag sa Banat News nga ang biktima nagsakay sa iyang bisiklita dihang gikasugat niya ang trak de karga nga gikan sa lungsod sa Aloguinsan paingon sa siyudad sa Toledo.
Apan matud pa sa suspetsado nga kalit lang nga milabang sa pikas lane ang biktima hinungdan nga naglisud siya pagpugong sa iyang sakyanan gumikan sa kakalit hinungdan nga nadasmagan gyud kini.
Gumikan sa kakusog sa pagkadasmag nabali ang tiil sa biktima ug nalabay kini ug sa pagtugpa sa sementadong karsada napantok ang ulo nga maoy hinungdan sa iyang kamatayon.
Ang suspetsado mitahan dayon sa kapolisan ug nagpaabot pa sa tukmang sumbong nga ipasaka batok niya. (BANAT NEWS)