Bakud ug LP mag-alyansa

CEBU, Philippines -  Gitakda ang pormal nga pagpahibawo sa panag-alyansa tali sa Liberal Party ug Barug Alang sa Kauswagan ug Demokrasya (Bakud) sa ikalimang distrito sa lalawigan sa Sugbo karong Hulyo 7.

Kini atol unya sa kasaulogan sa adlaw’ng natawhan sa pangulo sa Bakud, Bise Mayor Ramon “Nito” Durano III sa dakbayan sa Danao nga giingong tambungan ni Presidente Benigno Aquino III.

Sila si Durano, anak nga si Kong. Ramon “Red” Durano VI ug Bise Gob. Agnes Magpale nakigtagbo kang Aquino ug Secretary Mar Roxas sa Malacañang niadtong Huwebes diin natuki ang panag-alyansa sa partido.

Nunot niini, dayag na nga si Magpale ang mamahimong kapares ni Hilario Davide III sa pagka-gobernador ug bise gobernador sunod tuig nga eleksiyon.

Nasayran nga ang One Cebu party sa mga Garcia nagtinguha usab kang Magpale nga mamahimong kapares ni Kong. Pablo John Garcia.

Apan si Garcia miingon nga ilang paabuton ang pormal nga pagpahibawo sa Bakud Party sa ilang panagbuwag na sa umaabot eleksyon. Ang One Cebu ug Bakud nag-alyansa sa niaging duha ka eleksiyon.

Gani si Gob. Gwendolyn Garcia dako ang nakuhang mayoriya sa ikalimang distrito nga maoy naghatag kaniya og mayoriya nga dul-an sa usa ka gatos ka libo ka botos batok kang Davide sa niaging eleksiyon.

Karon nga mag-alyansa na ang LP ug ang Bakud, malaumon si Davide sa iyang kadaugan sanglit sa distrito siya ni Magpale napilde og daku batok kang Garcia.

Ang ikalimang distrito gilangkuban sa mga lungsod sa Borbon, Carmen, Catmon, Compostela, Liloan, Pilar, Poro, San Fransisco, Sogod, Tudela, ug dakbayan sa Danao. (BANAT NEWS)