Taga barili nag-inamotay para krudo

CEBU, Philippines - Nagtampo-tampo ang mga negosyante ug yanong molupyo sa lungsod sa Barili aron may ikapalit og krudo sa mga garbage truck nga mohakot sa basura sa lungsod nga dugay nang nabaho sa atubangan sa merkado publiko sa lungsod.

Gibutyag ni Mayor Teresito “Undo” Mariñas sa Banat News nga gumikan sa pag-inamotay nila og kuwarta, sugod niadtong miaging Lunes nakadagan   ang ilang duha ka trak sa basura nga maoy nanghakot sa basura.

Matud pa ni Mariñas nga mapasalamaton kaayo siya sa iyang tagi-lungsod nga malumo og kasingkasing nga misanong sa iyang hangyo aron mahinlo ang basura sa ilang dapit.

Pipila sa mihatag og donasyon nga P10 mil mao ang naila na kaayong negosyante sa lungsod nga   si Enrique Abellana nga maoy tag-iya sa rural bank sa Barili.

Samtang ang tag-iya sa Flyover Hardware nga si Edilyn Fernandez midonar usab og P5 mil ug daghan pang mga donasyon   gikan sa mga lungsoranon nga wala na magpaila.

Matud ni Mayor Marinas   nga lakip nga misimpatiya   kanila mao ang konseho sa barangay Poblacion   nga gipangunahan ni Ted Caumeran nga nagkauyon sa pagdonar og P70 mil pinaagi sa giumol nga resolusyon.

Ang ubang mitabang alang sa gikinahanglang krudo mao si konsehal Ditas Alquisola kinsa midonar og P 2 mil , ingon man ang konsehal sa barangay Japitan Fancisca Montemayor kinsa   maoy mipalit og krudo sa garbage truck   nga   tighakot   sa mga basura sa ilang barangay.

Hinuon matud sa mayor nga duha lang ka adlaw matag semana ang schedule sa pagpanghipos sa basura tungod kay ang gahin sa krudo nag-agad man sa mga donasyon sa mga molupyo.

Namatikdan ni Mayor Mariñas ang kadasig sa iyang tagilungsod nga mitabang sa maong gimbuhaton kay bisan ang mga vendor   nagtampu-tampo og tag P100, may miamot og P50 aron lang   mahipos ang mga basura. Nasayran nga nahunong ang koleksyon sa basura sa Barili niadtong sayong bahin ning buwan sa Hunyo dihang nagdumili   ang gasoline station nga suki sa lungsod sa pagpautang og krudo ug gasolina tungod sa utang sa kagamhanan    nga mibalor og P200 mil.

Usa sa hinungdan nga wala kabayri ang maong utang mao ang pagdumili sa mga konsehal nga pinili sa katawhan sa lungsod sa paglig-on sa supplemental budget sa mayor nga P1.8 milyones   alang sa krudo ug gasolina sa tanang 30 ka sakyanan sa lungsod .

Nunot niini gi-organisar na usab karon sa mayor ang Purok Garbage Collection Task Force nga langkoban sa mga   drayber sa sikad -sikad  nga maoy tahasan sa paglabay sa basura mentras wala pay kuwarta nga gigahin ang mga konsehal sa lungsod alang sa krudo sa mga garbage truck.

Sayo niini nanawagan ang mayor sa mga molupyo sa lungsod nga magtinabangay pinaagi sa pag-iyahay una og hipos sa mga basura pinaagi sa pagbahig sa malata ug dili malata   ug   ang malata ibutang sa compost aron mahimong abuno samtang ang dili malata ilabay ngadto sa usa ka lugar nga lahi sa mga malata. Ang mga konsehal nga nagdumili sa paggahin og krudo alang sa mga garbage pulos mga pinili sa katawhan sa milabay nga election. (BANAT NEWS)