NBI Bacolod mihimakak nga mihingalan sa banay sa VG

BACOLOD CITY, Philippines  — Gihimakak ni NBI-Bacolod director Ferdinand Lavin nga ilang gitumbok ang usa ka sakop sa pamilya ni Negros Occidental Vice Governor Genaro Alvarez Jr. sa pagpatay kang Kabankalan Regional Trial Court Judge Henry Arles.

 “I would like to make it clear that I did not categorically state that it was the family of those being referred (to) now in several newspapers,” matud pa ni Lavin sa usa ka radio interview.

 “Honestly, I do not know who floated the good name of the family but insofar as the NBI is concerned, we are seriously considering that angle as we have seriously considered the other angles of equally powerful and influential clans in the south (of Negros Occidental),” dugang pa niini.

 “Wala akong binanggit na pangalan ng pamilya. Ang sinasabi ko ay our pieces of evidence so far lead to a powerful and influential clan in the south,” pasabot pa niini ug ning tungora mibutyag siyang dili lang sa sixto distrito.

Apan niadtong Martes, sa interbyu kang Lavin sa mga tigbalita diha sa buhatan sa gobernador dihang kini gipangutana sa mga tigbalita kun posible bang nag-imbestigar sila sa kalambigitan sa mga sakop sa pamilya ni Alvarez, ug kini giingong mitubag og :“If you are asking me about that, we are seriously looking into that angle.”

Niadtong Martes, giklaro niyang usa sa ilang gilili nga anggulo ang maong posibilidad apan giklaro niyang wala kini magpasabot nga ang bise gobernador gyud ang ilang puntariya.

Nagdumili hinuon si Lavin paghatag og impormasyon kabahin sa motibo sa pagpatay sanglit nabalaka silang maapektahan unya ang dagan sa kaso ug mabutang sa peligro ang mga testigo.

Si Arles gipusil patay niadtong Abril 24 lungsod sa Ilog. Gisusi na sa NBI ang tanang mga kasong gikuptan ni Arles. Ang Task Force Arles sa Negros Occidental Police Provincial Office naghimo usab og kaugalingong imbestigasyon sa maong kaso. Si Alvarez sa iyang bahin, mihimakak sa alegasyon ug miingon nga wala siya makaila ni Arles. Dugang pa niya nga wala say rason ang ilang pamilya nga masuko kang Arles aron kini ipapatay. Ang bugtong nakita lamang ni Alvarez mao nga “politically motivated” ang pagduhig sa ilang pangalan sa maong kaso.

"Is this what happens after I am rumored to be running for governor?" pangutana pa ni Alvarez apan wala na mohatag pa og dugang pagpasabot. Sumala pa niya walay sakop sa ilang pamilya nga dunay kaso diha sa sala ni Arles. Si Lavin miingon nga upat ka dagkong pamilya sa Negros ang ilang gisusi kalabot sa maong pagpatay. (BANAT NEWS)