Tinun-an giagtang pagpusil patay

CEBU, Philippines - Usa ka tinun-an nga nagpalit og hiniwang mangga ang gipusil patay sa wala mailhing lalaki kagahapon sa udto diha sa sitio Trinidad sa barangay Punta Princesa siyudad sa Sugbu.

Si Darryl Porquido Decatoria,18, nagpuyo sa maong lugar ug tinun-an sa Alternative Learning System (ALS) diha sa maong lugar, patay diha dayon human nakaangkon og samad pinusilan sa agtang ug milapos ang bala sa luyong bahin sa iyang ulo.

Si SPO1 Victor Ruel Ayuman sa Homicide Section nga nahinabi sa Banat News nagkanayon ang suspek gihulagway nga pution, nagsul-ob blue t-shirt, maong pants ug nagsul-ob og ball cup.

Si Celso Daclan nagpuyo sa maong lugar ug manindahay og mangga mitug-an sa kapulisan nga mipalit kaniya og mangga ang biktima.

Samtang siya nagpanit sa mangga ug ang biktima diha sa iyang kilid, kalit lang miabot ang suspek ug nangutana kun wala ba sila makaila sa ginganlan og Dario.

Gitubag sa biktima nga wala sila makaila hinungdan nga milakaw ang suspek apan kalit lang milanog ang buto sa armas. Gumikan sa kahadlok, ang saksi midagan ug sa iyang pagbalik iya nang nakita ang biktima nga natumba ug may samad pinusilan sa agtang.

Matud ni Ayuman nga iyang naestorya ang igsuon ug inahan sa biktima nga si Catalina nga walay kontra ug giapilan nga grupo ang iyang anak.

Nakuha sa crime scene ang usa ka slug sa gituohang kalibre .357 nga bala nga maoy gigamit sa suspek.

Si Ayuman miingon nga duna silay gisubay nga anggulo ug motibo sa maong kaso apan dili pa niya ikabutyag aron dili maapektahan ang ilang imbestigasyon. (BANAT NEWS)