Polis nagpa-binisaya namatay

CEBU, Philippines - Usa ka polis sa Cebu City Police Office ang namatay pipila ka oras human kini magpa-“Binisaya” pagtambal sa iyang sakit nga diabetes diha sa usa ka tambalan sa lungsod sa Barili niadtong Miyerkules sa hapon.

Ang maong polis giilang si PO1 Alain Dignos, sakop sa Investigation and Detective Management Branch sa Cebu City Police Office kinsa patay nang nadangat sa Barili District Hospital.

Sumala pa ni PO1 Richard Cababat sa Barili Police Station nga gikahinabi sa Banat News nga si Dignos miabot sa maong lungsod niadtong Martes kauban ang kapuyo niini nga si Melissa Baydal.

Matud pa niini nga si Baydal lumad nga taga Barili. Gikatahong luya na kaayo si Dignos ug gidala kini sa usa ka tambalan sa barangay Tubod sa maong lungsod aron ipa-Binisaya ang iyang sakit.

Apan wala gyud molurang ang kasakit nga gibati ni Dignos sa iyang tiyan bisan sa pagpabinisaya hangtud sa gidala na lang kini ngadto sa Barili District Hospital apan patay na kini.

Ang inahan sa kapuyo ni Melissa nga si Jovencia mibutyag sa mga tigbalita nga daan nang naglain ang lawas ni Dignos niadtong gabhiuna (Martes) ug pagkasunod adlaw migrabe kini hinungdan nga gidala nila kini sa maong tambalanan.

Sa gihimong awtopisya ni Dr. Nestor Satur sa PNP Crime Laboratory-7 walay nakitang timailhang gibinuangan o ‘foul play’ sa kamatayon ni Dignos.

Hinuon gibutyag ni Satur nga duna kini sakit nga diabetes. Si Chief Insp. Bonifacio Garcia, ang hepe ni Dignos mihulagway kang Dignos nga seryoso sa trabaho ug dili magpasumangil aron dili makatungha sa trabaho bisan duna kini gibati sa lawas.

Si Dignos nasulod sa PNP niadtong Disyembre 2003, ang lawas ni Dignos gihaya sa St. Peter Funeral Homes. (BANAT NEWS)