CEBU, Philippines - Mibahad ang taga Maritime Police nga silay mokiha sa tagdumala sa Cokaliong Shipping Lines gumikan sa kadanghag niini nga wala makapugong sa milayat sa dagat nilang pasahero ug namatay sa miagaing semana.
Kini matud pa ni Supt Alvin Piad hepe sa Maritime Police nga maoy ilang buhaton kun ang mga opisyal sa Philippine Coast Guard magdumili sa pagpasaka og kaso sa maong kompaniya sa barko.
Sa interview sa TV5 gibutyag ni Piad nga segun sa ilang imbistigasyon aduna gyuy dakong tulobagon ang management sa Cokaliong ug angay kining manubag sa pamilya sa biktima.
Matud pa ni Piad nga nalatid sa kontrata tali sa pasahero ug sa barkong gisakyan niini nga human sa paglukat og tiket responsibilidad sa barko ang paghatud sa iyang pasahero sa distinasyon niini nga luwas sa kadaot.
Busa iyang giawhag ang kabanay ni Ma. Grethel Enas nga makig-alayon kanila ilabi na sa kasong criminal nga ilang isang-at batok sa Cokaliong
Hinuon si Gladys Teves igsoon sa biktima mitataw nga andam sila nga maminaw sa habig sa Cokaliong kun ugaling makig-areglo kini kanila
Apan hangtud karon wa pa mopagawas ug opisyal nga pamahayag ang management sa maong barko bahin sa nahitabo.
Si Enas misakay sa MV Pilipinas nga iya sa Cokaliong gikan sa Surigao City paingon sa Sugbo dihang milayat kini sa kadagatan sa isla sa Camotes ug pipila ka adlaw nabangalan ang patay niyang lawas didto baybayon sa Leyte.
(BANAT NEWS)