Sa Kasaysayan Karon: Hunyo 21

CEBU, Philippines - 1565— Gideklarar sa Espanya si Miguel Lopez de Legaspi isip maoy labing unang Gobernador-Heneral sa Pilipinas. Kini human mga lider sa mga Filipino nalupig sa gubat ug naestablisar sa Espanya ang kaugalingon isip tagdumala sa Pilipinas.

1896—Natawo ang imbentor sa gitawag nga “Momsen Lung” nga kanhi opisyal sa US Navy nga si Charles Bowers Momsen. Si Momsen kinsa miretiro sa serbisyo sa ranggong Vice Admiral maoy unang nakaimbento sa ekipong nakaluwas og gatosang kinabuhi sa mga crew sa malunod nga mga submarino. Ang iyang imbensyon ginama sa goma nga gisudlan og hangin ug may lime soda nga konektado sa baba sa crew, pinaagi niini makaginhawa ang crew ini og gawas nila sa submarino aron makaikyas ug molutaw og balik sa taas. Ang hangin sa maong goma ma-recycle ra tungod sa soda lime ug dili makapatay sa tawo. Tungod sa iyang imbensyon nakadawat siya og Distinguished Service Medal (1933). Hinuon karon duna nay mas modernong pamaagi sa pag-eskapo gikan sa nalunod sa submarino.

1893—Unang naimbento ang makalingaw nga atraksyon sa mga pista o karnabal nga gitawag og Ferris wheel. Una kining gipailaila sa publiko sa Chicago Columbian Exposition sa ikatulong America’s World Fairs. Naimbento kini ni George Washington Ferris, nga lumad nga taga Pittsburgh ug mamuhatay og mga taytayan. Tuyo lang ni Ferris nga mohimo og atraksyon sa Amerika sama sa Eiffel Tower sa Paris. Ang unang Ferris wheel dunay 36 ka sakyanan nga makadala og 60 ka tawo. Duna kini gihabugong 264 feet. Namatay si Ferris upat ka tuig human niya maimbento ang Ferris wheel sa edad nga 38.

2005—Ang layag dili lang gamiton sa mga sakyanan sa dagat, mahimo sad diay kining gamiton sa mga spacecraft nga naglawig sa kawanangan. Niadtong June 21, 2005 malampusong napalupad ang labing unang solar sail spacecraft nga gitawag og Cosmos 1 gikan sa Volna Rocket nga gipalupad sa usa ka Russian submarine diha sa Barents Sea. Ang layag niini nga ginama sa nipis kaayong aluminum alloy may gilapdong 650 square meters. Kini gipundohan sa US Planetary Society og 4 milyones dolyares ug gihimo sa Lavochkin Association ug Space Research Institute of the Russian Academy sa Russia. Buot mahibaw-an sa grupo kung posible bang modagan ang usa ka spacecraft gamit ang light radiation sa adlaw. BANAT NEWS