Tungod sa kanding papa giluba sa anak

CEBU, Philippines - Nakigbugno karon sa kamatayon ang usa ka 67-anyos nga mag-uuma human giunay og dunggab sa iyang hubog nga anak nga nasukong gikasab-an tungod sa wala paghipos sa ilang mga binuhing kanding sa sitio Banika sa barangay Bahay lungsod sa Sibonga niadtong Martes sa gabii.

Ang biktima mao si Manuel Nerosa, 67, nagpuyo sa maong lugar samtang gitanggong sa kapolisan ang anak niining si Emmanuel Nerosa, 33 nga gitumbok nga maoy midunggab kaniya. Matud ni PO3 Dante Molo sa Sibonga Police dihang nahinabi sa Banat News subay sa imbestigasyon gikasab-an og maayo sa amahan ang suspek tungod kay wala kini manghipos sa ilang mga kanding.

Tungod sa kauwaw milakaw ang suspek ug nakig-inom sa mga higala ug sa pagbalik niini nianang pagkagabii diretsong gisaka sa higdaanan ang amahang natulog ug gidunggab tulo ka higayon.

Ang mga silingan na nila maoy midala sa biktima sa Deiparine Medical Clinic ug gibalhin kini sa tambalanan sa dakbayan sa Sugbo tungod sa katalandugon niini.

Ang suspek nadakpan sa hot pursuit operation sa kapulisan kagahapon sa alas 6:00 na sa buntag sa pinuy-anan niini. BANAT NEWS