Milayat nga priso sa CCJ kinahanglang operahan

CEBU, Philippines - Kinahanglan mapailawom og duha ka operasyon ang pinirisong maayong pagkamumo sa iyang nawong sa sementadong dalan sa gawas sa Cebu City Jail human siya molayat sa ikaupat nga andana sa Drug Offenders Building niadtong Biyernes.

Ang maong prisohan nga nahimutang sa barangay Kalunasan sa siyudad sa Sugbu nahimutang sa bukid ug taas ang mga paril.

Si Supt. Johnson Calub, warden sa Cebu City Jail mitug-an nga si Joey Ceniza pabilin gihapon sa Cebu City Medical Center (CCMC) ug kinahanglang maoperahan.

Si Ceniza, 20, taga Barangay Lorega-San Miguel, ning siyudad nakaangkon og mga samad ug bun-og sa iyang ulo ug sa nawong uban sa ubang parte sa kalawasan human sa iyang pakyas nga pag-eskapo.

Matud ni Calub ang mga doktor mipahibalong kinahanglan si Ceniza og reconstructive surgery sa iyang nawong ug sa nangalubo niyang ngipon, nagrabehan usab sa impact ang iyang duha ka mata ug liog maong kinahanglan usab siya og espesyalista.

Gidugang ni Calub ang upat ka medical procedure wala pa masugdi sanglit ang mga kabanay ni Ceniza wala pa makahukom nga tumanon ang procedure alang sa recovery niini. “Hopefully mogasto ang relatives ni Ceniza kay maluoy ta niya,” panghinaut pang Calub.

Ang mga imbestigador dunay pagduda nga posibleng moeskapo o ba kaha maghikog si Ceniza tungod kay gikatahong nag-away kini ug iyang kapuyo sa dihang mibisita ang babaye niadtong Hunyo 3. Si Ceniza nasulod sa maong pasilidad niadtong Hunyo 27, 2011 ug padayon pang gipaabot niini ang hearing sa iyang kaso sa ilegal nga drugas. BANAT NEWS