CEBU, Philippines - Si Konsehal Romeo Villarante sa oposisyon sa konseho sa dakbayan sa Talisay mipasidaan nga dili angayang i-discriminate silang oposisyon tungod kay adunay mga sektor og grupo nga andam kaayong mosuporta kanila.
Iyang gitug-an nga ang mosuporta kanilang pundok mao ang grupo sa simbahan ug urban poor nga pulos lig-on ug kasaligang pundok sa Talisay.
Ang maong pamahayag gihimo ni Villarante dihang nabati nila ang santako sa mga opisyal sa administrasyon kinsa mipagarpar nga matud pa nagkahilis na ang oposisyon karon sa Talisay.
Usa niini mao ang giingong namalhin na sa partido sa administrasyon ang ubang mga oposisyon busa hayan nga inig-abot sa election wala nay mobotar sa oposisyon.
Apan si Villarante nga usa ka sakop sa Liberal Party nagkanayon nga naglayag ang ilang pundok karon nga maoy gikahidlawan sa katawhan sa Talisay.
Busa dako siya og paglaum nga sa pag-abot sa election tataw kaayo nga magbansiwag ang kadaugan nilang mga oposisyon. Hinuon sa bahin sa mga opisyal nga sakop sa administrasyon kini nagkanayon nga ang pulso lang sa Talisaynon maoy agdon sa adlaw sa election. BANAT NEWS