Mga negosyante mihangyo sa truck ban

CEBU, Philippines - Tungod sa hangyo sa mga negosyante sa dakbayan sa Talisay wala na pahugti ang implementasyon sa City Ordinance 2012-5-1 oTruck Ban Ordinance sa dakbayan matud pa ni Bise Mayor Alan Bucao.

Kahinumduman nga niining bag-o lang human maaprobahi ang ordinansa sa truck ban nga gipangamahanan sa bise mayor gipangsikop ang mga trak nga magpundo daplin sa dalan.

Tuyo niini nga dili maghuot ang dagan sa trapiko sa siyudad tungod sa magpundong mga delivery trucks sa nagkadaiyang establisamento.

Matud pang Bucao mihangyo ang mga negosyante nga dili lang una karon higpitan ang implementasyon sanglit wala pa daw sila maka-adjust sa oras sa paghatud sa ilang mga produkto.

Gibana-banang dunay mokabat sa 25 ka mga establisamento sa Talisay sama sa mga developer ug manufacturing ang naapektahan sa maong ordinansa ,sagad kanila walay kaugalingong parkingan.

Gawas sa kahuot sa trapiko gibasol usab ang mga nagpundong trak sa daplin sa mga disgrasya kay masap-ongan niini ang gamay kaayong dalan ug dili makabantay ang molabang.

Ang truck ban ipatuman gikan Lunes hangtud sa Biyernes sa alas 5:30 sa buntag ngadto sa alas 8:30 sa buntag ug gikan sa alas 3:00 sa hapon ngadto sa alas 9:30 sa gabii sugod niadtong Hunyo 15.

Kini anha lang ipatuman sa dalan Rabaya, Polong Deiparine, Prisco Deiparine, Sangi road, Laray, Lagtang-Toledo Wharf road, Sombrea-Pooc ug Linao-Mohon Dumlog road.

Ubos sa maong balaod nga ang truck nga dunay gibug-aton nga 4,500 kilogramos mao ray maigo sa truck ban. Hinuon walay labot niini ang mga sakyanan sa gobiyerno. Kun may katalagman awtomatikong ipadaplin ang maong ordinansa aron makalusot ang mga relief goods ug batakang panginahanglan sa publiko.

Ang multa sa makalapas niini P1,500 sa unang kalapasan, P2,500 sa ikaduhang kalapasan ug pagkabilanggo sulod sa usa ka semana ug P5,000 sa ikatulong kalapasan ug pagkapriso sulod sa duha ka semana. (BANAT NEWS)