Negosyante gikiha sa NSO

CEBU, Philippines - Gitakda ugmang adlawa, Hunyo 21, ang bista sa kasong kriminal   nga gipasaka sa National Statistics Office (NSO) 7 batok sa usa ka negosyante kinsa napakyas sa pagtahud sa survey nga gipahigayon sa maong ahensya alang sa negosyo niini. Si Juanilla “Bebe” Premne, Cebu City north distict officer sa NSO 7 atol sa AGIO Forum nga gipahigayon sa ilang buhatan kagahapon miila sa gipasakaan nila og kiha sa Municipal Trial Court branch 4 nga si Benjamin Cabinian ang tag-iya ug tagdumala sa Cebu Golden Buns Corp, usa ka cake shop nga nahimutang sa dalan Fulton, sa barangay Lahug ning dakbayan sa Sugbo.

Matud ni Premne, nga gihimo na nila ang tanang paagi pagkombinse sa respondente nga mofill-up sa survey form nga ilang gipadala niini aron masayran ang datos bahin sa lakaw sa iyang negosyo sukad pa sa tuig 2010.

Apan matud pa ni Premne nga wala sila makasabot unsay hinungdan sa pagdumili sa maong negosyante sa pag-fill-up sa survey form nga unta wala may angay ikahadlok ang pakisusi nga ilang gihimo bahin sa iyang negosyo.

Hinuon matud pa ni Premne nga mahimong makapiyansa ang hingtungdan aron dili mapriso.

Apan tungod kay may rekord na siya sa kasong criminal, usa kini sa mahimong babag sa iyang pagkatawo nga mosangit sa iyang tuyo sama pananglit kun buot siyang mobiyahe ngadto sa gawas sa nasud ug uban pang katuyoan nga may labot sa iyang negosyo. (BANAT NEWS)