CEBU, Philippines - Usa ka drayber sa motorsiklo kinsa naangol uban sa angkas niini human sila modasmag sa puthaw nga railing sa daplin sa karsada gisikop sa kapolisan kay nagtangkil og paltik nga armas de fuego didto sa barangay Tapon ,lungsod sa Dumanjug niadtong Domingo sa gabii.
Ang naangol nga mikagulkol sa prisohan mao si Randy Boquecosa, 28 , ulitawo, nga taga barangay Kanguha, Dumanjug, samtang kauban niyang angol usab mao si Johnny Gerodias, 30, ulitawo, nga taga barangay Pawa, sa mao gihapong lungsod.
Si SPO2 Florencio Clarion sa Dumanjug Police Station mibutyag sa Banat News nga nagpaingon sa barangay Bitoon ang mga biktima nga gikang nag-inom dihang pag-abot niini sa maong lugar kalit nga misaliring ang gisakyan nilang motor ug midasmag sa puthaw nga railing ug nangalamba.
Ang mga nakasaksi daling misumbong sa kapolisan ug pag-abot sa mga otoridad gialsa ug gikarga sa ambulansya ang mga biktima dihang nahinolan sa hawak ni Boquecosa ang kalibre 357 nga armas nga may tulo ka buhing bala.
Gi-imbargo sa kapolisan ang armas ug gihatud ang mga biktima sa Barili District Hospital apan kagahapong adlawa nakagawas na ang duha ug si Boquecosa gideretso og balhug sa karsel ug gipasakaan og kaso bahin sa illegal nga paghupot niini og armas de fuego.(/WC) (BANAT NEWS)