CEBU, Philippines - Gisaulog sa kagamhanan sa dakbayan sa Lapulapu ang ika -50 ka tuig nga Charter Day anniversary kagahapon uban sa nagkalainlaing kalihokan.
Naglakip sa mga kalihokan mao ang misa nga gitambongan ni Mayor Paz Radaza, mga sakop sa konseho nga gipangulohan ni Bise Mayor Marcial Ycong.
Mitambong usab sa maong kasaulogan si Kongresista Arturo Radaza sa Lone Congressional District sa Lapulapu City.
Si Association of Barangay Council Federation President Leo Mercado mao usab ang nangulo sa mga opisyal sa barangay nga gilangkoban sa 19 ka barangay sa mainland ug 11 ka barangay sa isla sa Olango.
Dugang nga mitambong sa maong kasaulogan mao ang tanang mga kawani sa lokal nga kagamhanan sa maong dakbayan ug ingon man usab sa mga ahensya sa nasudnong kagamhanan.
Naglakip sa mga kawani sa nasudnong kagamhanan nga mitambong sa maong kalihokan mao ang mga sakop sa kapolisan, mga magtutudlo sa Department of Education (DepEd) sa maong dakbayan ug uban pa.
Ang kasaulogan maoy pagtimaan sa kakusog sa paglambo sa Lapulapu diin gikan sa pagkalungsod niini misaka ngadto sa pagkadakbayan, unya nahimo kining highly urbanized nga dakyanan ug karon nahimong lone congressional district sa lalawigan sa Sugbo. (BANAT NEWS)