Hunta mipasi-dungog sa CPPO

CEBU, Philippines - Gipasidunggan sa Hunta Probinsyal sa Sugbu ang Cebu Provincial Police Office (CPPO) tungod kay nanguna kini sa tanang police offices sa Central Visayas pag-abot sa kampanya batok sa ilegal nga drugas, sugal ug illegal firearms. Ning bag-ohay lang gipasar sa hunta probinsyal ang resolusyong gipangamahanan ni Board Member Sun Shimura kinsa maoy pangulo sa committee on public order and safety nga nagdayeg sa CPPO.

“Said accomplishment should serve as a motivating impulse to intensify more the CPPO’s untiring campaign for public safety, peace and order in the Province of Cebu,” sumala pa sa resolusyon ni Shimura.

Ang CPPO maoy dunay labing daghan og malampusong operasyon sa ilang kampanya batok sa nahisgutang mga krimen subay sa record sa Regional Operations and Plans Division sa Police Regional Office-7.

Si Police S/Insp. Ramoncelio Sawan sa ROPD sa PRO 7 miingon nga ang niadtong Abril ang CPPO maoy nanguna sa “positive operational performance” itandi sa pito ka police offices sa rehiyon.

Ang pito ka police offices base sa ilang performance mao ang CPPO; Negros Oriental Police Office (NOPPO); Bohol Provincial Police Office (BPPO); Siquijor Provincial Police Office (SPPO); Cebu City Police Office (CCPO); Mandaue City Police Office (MCPO); ug ang Lapulapu City Police Office (LLCPO).

Gibase sa ranking sa nag-unang target nga papason sa kapolisan nga mao ang kampanya sa ‘Kontra Boga’ (loose firearms), illegal drugs, ug illegal gambling. (BANAT NEWS)