Unsa diay Nang overspeeding?

CEBU, Philippines - Usa ka drayber og kotse nga pwerteng kusoga nga nakapadagan sa iyang sakyanan sa crowded kaayo nga dapit didto sa Barangay Parian gidakop sa usa ka ahente sa Land Transportation Office (LTO) tungod sa overspeeding.

Dihang nadakpan na ang maong drayber, diha pa siya mahibalo gikan sa LTO law enforcer nga duna diay balaud nga nag-regulate sa mga drayber kun unsa ang gikusgon sa pagpadagan nila sa sakyanan.

Ang Section 35 sa Land Transportation and Traffic Code naglatid nga kinahanglang dili molapas sa 20 kilometer per hour ang pagpadagan sa bisan unsa nga matang sa sakyanan kun moagi sila sa crowded nga karsada ug dunay blind corners.

Sa mga national highways nga walay mga “blind corners” ug mga tawo nga posible nga mokalit lang paglabang, ang mga motorista makahimo sa pagpadagan og 80 kilometer per hour ang mga passenger cars ug motorcycles.

Ang mga truck ug bus gitugotan lang nga makapadagan lamang og 50 kilometros matag oras, sa ato pa dili kaayo kusog. Apan wala kaayo kini ikapatuman tungod kay ang mga traffic police sa kalungsuran wala man magpakabana. Ang balaud naglatid nga ang exempted niining maong lagda mao ra kadtong mga doktor o ang iyang drayber kun kini adunay gidalian nga pasyente, ingon man ang mga drayber sa ambulansya ug kadtong mga magkarga og samaron o masakiton nga paingon sa ospital.

Ang drayber nga nasakpan sa LTO law enforcer nga kusog kaayong nagpadagan diha sa dalan Sikatuna, misuway sa pagpangatarungan nga wala siya masayod sa iyang gikusgon kay guba ang iyang ekipo sa sakyanan.

Ang mga tag-iya sa sakyanan gitahasan nga atimanon kanunay ang ilang kagamitan aron dili sila makalapas sa balaud. (BANAT NEWS)