CEBU, Philippines - Tulo ang angol sa binuwag nga kaso sa pagpanunggab sa managlahing lugar ning dakbayan sa Sugbo sa miaging gabii.
Ang mga biktima mao sila si Virgilio Taboada ug Efren Palomar pulos hingkod nga managsilingan usab sa sitio Katangkungan, barangay Sambag I ug Erwin Randina, 24, nga taga barangay Carreta pulos ning dakbayan sa Sugbo. Ang tulo wala maintimano kay igo lang natiyan busa anaa sila karon sa nagkalainlaing tambalanan ning dakbayan.
Ang miluba kang Taboada ug Palomar mao si Nicanor Tejada, taga barangay Guadalupe.
Matud pa sa kapolisan nga hubog ang maong suspek sa maong higayon ug gipangluba ang mga biktima sa walay igong hinungdan.
Samtang ang miluba usab kang Randina mao si Generlito Quintahi, nga silingan sa biktima.
Ang biktima kinsa pag-umangkon sa kapuyo sa suspetsado, nagkanayon nga igo lang siyang mibadlong sa iyang iyaan nga kapuyo sa suspek gumikan sa kahubog niini dihang kalit gihansakan ang iyang tiyan sa kutsilyo sa suspetsado.
Sa pagkakaron padayon pang gipangita sa kapolisan ang mga suspetsado kinsa pulos nakasibat human makaluba. (BANAT NEWS)