Konsehal young naugtas sa K to 12

CEBU, Philippines - Puwerting pungota ni Bise Mayor Joy Augustus Young niining gipatuman karon nga K to 12 program sa Department of Education kay misamot kabug-at ang suliran nga giatubang    sa maong ahensya.

Si Young nga nagpangusmo sa kalagot miingon nga wala pa gani masulbad ang problema sa kakuwang sa mga maestra ug classroom, gidugangan na usab ang maong problema niining K to 12.

Gani gisaysay ni Young nga gawas nga naglisod karon ang panahon, adunay ubang tunghaan ang wala na’y kabutangan og edipisyo busa wala nay kabutangan sa     mga tinun-an.

Sumala pa niya nga ang pag-implementar sa K to 12 nagpasabot nga tugbangan usab kini og dugang mga lawak klasehanan ug mga magtutudlo, nga dili unta maoy   prayoridad karon sa DepEd.

Gisulti ni Young nga hangtod daghan pang mga opisyal sa   DepEd nga   wala makumbinser sa maong programa apan wala sila’y mahimo gumikan kay mao man kini ang kamandoan ni Kalihim Armin Luistro.

Busa gihagit ni Young si Luistro nga mobiya sa katungdanan kay way ayo ang iyang paghupot sa maong puwesto.

Miingon si Young nga dili K to 12 maoy nag-unang suliran sa nasud kundi ang mga kasangkapan sa eskuylahan aron nga matudloan pag-ayo ang mga tinun-an.

Nagsipok ang ulo ni Young gumikan sa reklamo sa 250 ka kindergarten teachers sa dakbayan sa Sugbo kansang suhol wa dayon nila madawat.

Ang mga tigpaniid nagkanayon nga kun magpadayon si Young sa iyang kaugtas dili siya magpabilin nga young kay dali ra siyang matiguwang. (/WC)  (BANAT NEWS)