Preso milayat sa atop sa CCJ nagupok ang mga ngipon

CEBU, Philippines - Nangagupok ang mga ngipon sa usa ka piniriso human milayat sa rooftop sa usa sa mga edipisyo sa Cebu City Jail niadtong Biyernes sa hapon human kini ug ang mibisitang kapuyo nagkalalis.

Ang preso mao si Joey Ceniza, 20, molupyo sa Barangay Lorega-San Miguel ning dakbayan sa Sugbo, gisusi pa kung buot kining magpakamatay o buot lang gyud moeskapo pinaagi sa paglayat gikan sa atop sa ikaupat nga andana sa Drug Offenders Building alas 5:45 sa hapon sa miaging adlaw.

Si Supt. Johnson Calub, warden sa Cebu City Jail, ang mibutyag sa Banat News nga kalit nawala si Ceniza samtang nangandam sila sa ilang headcount sa gabii.

Matud ni Calub nga nakugang nalang sila dihang nakit-an sa usa sa mga jailguards sa tower 1 nga atoa ibabaw sa atop si Ceniza nga daw kaambakon na.

Pipila ka gutlo ang milabay kalit nga milayat si Ceniza ug nasukamod sa aspaltadong dalan gawas sa perimeter fence duol na sa tower 2.

“Murag misuway pa siya (Ceniza) sa pagkapot sa mga nets nga among gibutang against throwing of contrabands (bombing) inside the jail per midiretso gyud siya sa aspalto,” matud pa ni Calub. 

Nianang mga tungora naalerto na ang mga jailguards kinsa daling nakaduol kang Ceniza ug mitabang kaniya tungod kay nagkadugo na kini sa nawong, ulo, kamot, ug mga bun-og sa nagkadaiyang parte sa iyang lawas.

“Nangagupok gyud ang iyang ngipon tungod sa iyang pag-ambak. Maayo nalang gani kay wala kaayo siya ma grabihan,” asoy pa ni Calub. 

Usa ka Leo Morga nga nagpuyo sa maong dapit gikan sa balay sa iyaan sa sitio Opra maoy usa sa nakakita kang Ceniza nga nalup-og na sa dalan hinungdan nga gipahibalo niini ang mga jailguards kinsa daling miadto sa maong dapit.

Gidala sa Emergency Rescue Unit Foundation Inc. (ERUF) sa Cebu City Medical Center si Ceniza diin padayon gihapong nagpaalim sa iyang mga samad.

Subay sa pasiunang impormasyong nakuha sa mga imbestigador duna gyuy plano si Ceniza nga moikyas human gikatahong nag-away sa iyang kapuyo nga mibisita kaniya niadtong Hunyo 3.

Si Ceniza ang napriso sulod sa CCJ niadtong Hunyo 27, 2011 tungod sa kaso sa ginadiling drugas. (BANAT NEWS)