CEBU, Philippines - Patay ang usa ka 39-anyos nga tanod human kini nag-unay og pusil sa iyang ulo kagahapon sa kaadlawon diha sulod sa ilang balay sa barangay Pooc, dakbayan sa Talisay tungod kay giingong gihulga kining patyon sa bana sa iyang karelasyong babaye.
Ang naghikog mao si William Villanueva, tanod sa maong dapit nakaangkon kini og usa ka samad pinusilan sa tuong bahin sa ulo wala na makaabot nga buhi ngadto sa Talisay City District Hospital. Si SPO1 Mikie Espina nga maoy miresponde sa maong insidente naabtan si Villanueva diha sulod sa ilang balay nga naglunang na kini sa kaugalingong dugo.
Na-recover sa polis gikan sa posisyon sa lawas ni William ang usa ka kalibre .38 nga revolver nga dunay upat ka buhing mga bala ug usa ka kabhang sa tambor niini.
Ang asawa ni William nga si Edna Villanueva mibutyag kang Espina nga ang iyang bana dunay laing karelasyon nga nakapasilo kanila.
Giingong gikan nakig-inom sa mga higala misulod kini sa ilang balay ug gitiunan niini og pusil ang ulo ug misulti nga “maghikog na lang ko kay gihulga ko nga patyon sa bana sa babaye,” dayon gikablit niini ang gatilyo sa pusil.
Nasuta sa imbestigasyon ni Espina nga sa wala pa ang hitabo nakig-inom si Villanueva sa mga higalang sila si Jonathan, Daniel, Eping ug Allan. Giingong kini mitug-an kanilang duna siya’y plano nga maghikog tungod kay gihulga siyang patyon sa bana sa iyang karelasyon. Ang mga higala ni Villanueva mao say mitug-an niini ngadto sa asawa sa namatay. (/EIM) (BANAT NEWS)