CEBU, Philippines - Usa ka lalaki nga giingong gibiyaan sa iyang asawa ug anak ang napalgang nagbitay na sa punoan sa kahoy duol sa gitrabahoang poultry farm sa barangay Maricaban sa lungsod sa Sta. Fe sa Isla sa Bantayan niadtong Huwebes sa alas 5:00 sa hapon.
Ang nagpakamatay mao si Benjie Ardenio, lumad nga taga lungsod sa Balamban apan anaa na magpuyo sa maong lugar human maminyo ug nakatrabaho isip caretaker sa maong manokan. Matud ni SPO1 Rizalino Batendaan Jr. sa Sta. Fe Police Station dihang nahinabi sa Banat News subay sa inisyal nga imbestigasyon napalgan si Ardenio sa mga kauban sa trabaho nga nagbitay na sa punoan sa kahoy nga Narra.
Sayo pa nianang adlawa giingong nakig-inom si Ardenio sa mga silingan ug barkada ug nagsige og tabi nga maghikog siya tungod sa kaguol nga gibiyaan siya sa iyang asawa ug gidala pa ang ilang anak.
Apan wala nila kini panumbalinga tungod sa pagtuong hinubog ra kini nga komedya. Gisuwayan pa unta nila pagdala sa Bantayan District Hospital apan patay na kini. (EIM)