Pamilya sa ginang nga miambak sa barko naglaom pang buhi kini

CEBU, Philippines - Wala gihapon mawad-i og paglaom ang bana ug tulo ka mga anak nga dako pang buhi si Maria Grethel Enas, 39, nga gituohang miambak sa barko diha sa kadagatan sa Isla sa Camotes niadtong Huwebes sa kaadlawon gikan sa Surigao City.

Namatikdan nalang sa mga tripulante sa barko nga wala na diha ang biktima pagdunggo nila sa pantalan diha sa Pier uno niadtong Huwebes sa buntag.

Si Olibo Enas, bana sa ginang walay maayong kinatulgan sa miaging gabii gumikan sa pagpunay og hunahuna sa gidangatan sa iyang asawa.

Apan bisan pa man sa nahitabo sa iyang asawa, si Olibo wala gihapon mawad-i og paglaom nga dako pang buhi ang iyang asawa nga makit-an kini sa mga sakop sa Philippine Coast Guard (PCG) kinsa niadto pang Huwebes sa buntag mipahigayon og search and rescue operation didto sa kadagatan sa Isla sa Camotes.

Apan lahi ang gibati sa igsuong babaye sa biktima nga si Ma. Gladys Palomar Teves tungod kay gibasol niini ang tripulante sa barko nga wala makapakgang sa igsuon bisan nakabantay na sila sa lahi kaayong linihukan.

Kini base sa iyang nakita sa balita sa TV5 niadtong milabay’ng Huwebes sa hapon nga ang gwardiya miangkong nakahinabi pa niini ang maong ginang ug nakamatikod nga lahi na kini og lihok.

Nadawat na sa PCG ang marine protest nga giduso sa kapitan sa barko ug mao kini ilang basehan sa himoon nilang imbestigasyon.

Si Rolando Punzalan, pangulo sa Philippine Coast Guard Cebu-Station nagkanayon nga adunay search and rescue operation nga gihimo sa pamasin nga makit-an pang buhi si Enas.

Giangkon niini nga naglisod gyud sila sa operasyon gumikan sa kadagko sa bawod apan malaumon silang makit-an pa kining buhi.

Sa pikas bahin ang Marina-7 mohimo usab og linain nga imbestigasyon sa barko nganong way medical team nga misusi sa panglawas sa pasahero.

     Si Jose Cabatingan, legal officer sa Franchising and Maritime Legal Affairs Section sa Marina sa interbyu sa News5 nga matag barko nga mokarga og kapin sa 2 mil ka pasahero kinahanglan nga duna gyuy kaubang doktor. (BANAT NEWS)