Sa kasaysayan karon

CEBU, Philippines - 1977—Namatay ang usa sa mga utok sa manned space flights nga German-American rocket engineer nga si Wernher Magnus Maximilian von Braun. Si Braun usa ka kanhi German rocket scientist ug sakop ni Adolf Hitler niadtong Ikaduhang Kalibutanong Gubat ug utok pagkahimo sa V-2 Rockets nga gigamit pagpamomba sa Germany ngadto sa London. Human mapildi ang Germany sa Allied Forces gipasaylo siya uban sa mga banggiitang siyentipiko sa Germany ug gipadala sa US aron mopadayon sa ilang ekspiremento ug pagpalambo sa ilang nahibaw-an. Si Braun natudlong NASA director sa Marshall Space Flight Center ug maoy chief architect sa Saturn V rockets nga gigamit pagpadala og tawo sa bulan. Lakip sa iyang kontribusyon sa space technology mao ang Explorer satellites; Jupiter, Pershing, Redstone , Saturn rockets, ug ang Skylab.

1858—Niining petsaha namatay ang English obstetrician, epidemiologist ug giilang public health reformer nga si John Snow kinsa usa sa mga labing unang doktor nga migamit og anesthesia, ug nabantog nga banggiitang epidemiologist. Niadtong 1849, si Snow misuwat og usa ka libro nga diin iyang gibutyag nga makuha ang makamatay nga sakit nga cholera pinaagi sa hugaw nga tinubdan sa tubig. Apan wala siya paminawa sa ubang mga banggiitang mga doktor nga pabiling nagtuong ang ‘dautang’ hangin maoy nagdala niini. Niadtong 1854, nahitabo ang cholera outbreak sa London ug kini maoy nakitang kahigayonan ni Snow nga pamatud-an ang iyang pagduda pinaagi sa pagtagsatagsa niya og subay sa mga nasakit ug diha nadiskubrehing pareho ra sila og gipangkuhaan og tubig. Naputol ang pagdaghan sa mga nasakit dihang iyang nadiskubrehang ang kuptanan pa lang sa pangpublikong bomba o poso sa tubig dunay kagaw sa maong sakit ug ang tubig sa ilawom niini masudlan diay sa tubig sa kanal nga gikan sa mga tangkal sa mga hayopan.

1903—Nasayod ba mo nga ang sikat nga softdrink nga Pepsi-Cola nagsugod lang sa usa ka simpleng bugnaw nga ilimnong gibaligya sa usa ka botika? Ang botika gipanag-iya sa pharmacist nga si Caleb D. Bradham kinsa nakamatikod nga ang mga botika usa sa labing dugokon ug estambayan sa mga tawo gawas sa mga bars nga may mga bino. Tungod kay dili tanan gusto mahubog ug aron usab modako ang iyang halin, giapil ni Bradham ang pagbaligya og pangpabugnaw nga ilimnon nga gitawag nga softdrinks diha sa iyang botika. Niadtong 1898 nahunahunaan ni Bradham nga sagolon ang carbonated water, sugar, vanilla, oils, pepsin, ug kola nut extract ug gibaligya niya kini isip softdrink. Ang iyang softdrink daling nauyonan sa mga tawo sa New Bern, North Carolina ug misikat kini sa pangalang Brad's Drink. Tungod sa padayong pagsikat ug nailhan ang maong softdrink giilisan kini ni Bradham og pangalang Pepsi-Cola ug aron dili mailog ug makopya sa uban gipa-patent niya kini sa US niadtong Hunyo 16, 1903. Ang pangalang Pepsi-Cola gikan sa pangalan sa mga gisagol niyang pepsin ug kola nut extract nga giingong dunay maayong epekto sa lawas sa tawo. Ang pepsin, usa ka enzyme nga gituohan kaniadto nga makatabang paghilis sa pagkaon ug ang caffeine, nga usa ka alkaloid nga naa sa mga kola nuts, giingong naghatag og dugang enerhiya. (BANAT NEWS)