Ang imong kasaysayan karon

1915—Gipanganak si Thomas H. Weller ang Amerikanong physician, microbiologist ug virologist kinsa usa sa tulo ka mga siyentipikong nakadiskubre sa proseso pagbuhi og poliomyelitis virus sa test tube niadtong 1950s. Si Weller uban nila ni John Enders ug Frederick Robbins nahatagan og Nobel Prize for Physiology or Medicine niadtong 1954 tungod sa maong eksperimento nga miresulta sa pagkadiskubre usab kung unsaon pagpatay ang maong virus nga nahimo na karong polio vaccine.

1898—Natawo ang giilang‘father of space medicine” nga si Hubertus Strughold. Si Strughold nga usa ka German Nazi scientist panahon sa Ikaduhang Kalibutanong Gubat maoy director sa Nazi Medical Research for Aviation sa Germany atol sa maong gubat. Sumala pa nga lakip sa gieksperimentohan ni Strughold ang mga dinakpang Jews (Hudiyo) ug Gypsies pinaagi sa pag-torture kanila hangtud nga mamatay diha sa Dachau concentration camp. Lakip sa ekspiremento mao ang tuyong pagahion sama sa usa ka ice ang buhing tawo ug dalion pagpabalik ang temperatura niini kung kini himatyunon na, pinaagi niini nasukod ni Strughold ang tawo kung sila pasakyon og mga abyon ingon man spaceship, lakip sa ekspiremento kung hangtud asa ang kaya sa tawo sa tingog sa makina, vibration, atmospheric controls, paglutaw sa hangin, pagkaon alang sa astronauts ug uban pa. Human mapildi ang Germany sa Ikaduhang Kalibutanong Gubat, gisilotan ang tanang opisyales ug lider sa Nazi-Germany apan tungod sa kaalam ni Strughold sa aviation technology gikuha siya sa Amerika ug nahimong usa sa mga magtutudlo sa US Air Force School of Aviation Medicine.

2008— Namatay ang Amerkanong biologist, plant physiologist ug biothecist nga si Arthur W. Galston kansang mga nahimo kung unsaon pagpalambo ug pagpatay ang nagkadaiyang matang sa mga tanom miresulta sa pagkadiskubre sa Agent Orange sa ubang siyentipiko. Ang Agent Orange mao ang usa ka matang sa kemikal nga gigamit sa US Army pagpatay sa mga kalasangan sa Vietnam atol sa Vietnam War. Tuyo sa Amerika nga dili na makatago pa ang mga Viet Cong sa kalasangan. Si Galston kusganong misupak sa paggamit sa maong kemikal tungod kay makadaot kini sa kinaiyahan ug inabagan sa ubang siyentipiko gimando ni kanhi US President Richard Nixon ang paghunong og gamit sa maong kemikal sa Vietnam.

1844--Na-patent ni Charles Goodyear ang gitawag niyang "An Improvement in India-Rubber Fabrics" o “vulcanized rubber.” Sa pagkatinuod, aksidente lamang nga nadiskubrehan ni Goodyear ang maong lig-ong klase sa goma dihang natagakan niya og pulbos nga sulfur ang natural rubber nga iyang giluto diha sa pugon.