Bahin sa 'Protektor' issue 80-anyos midapig ni Supt. Recamara

CEBU, Philippines - Usa ka 80-anyos nga Talisaynon ang giingong midapig ug mipadayag sa iyang pagsalig ngadto sa kasamtangang hepe sa Talisay City Police Station nga si Supt. Eddie Recamara kinsa bag-ohay lang gipasanginlang ‘protektor’ sa illegal drugs.

Lakip sa gipadalhan sa maong suwat mao si Cebu Provincial Police Office (CCPO) Senior Superintendent Patrocinio Comendador, Bokal Julian Daan gipadalhan ingon man si PNP Director General Nicanor Bartolome.

Ang maong suwat midayeg ni Recamara tungod sa subsob nga kampaniya niini batok sa tanang krimen sa siyudad.

Si Algundo Bautista kinsa nagpaila diha sa iyang suwat nga usa ka crusader of good government nagkanayon nga nagpuyo siya sa Talisay sulod na sa 50 ka tuig ug nag-obserbar siya sa kahusay ug kalinaw sa Talisay.

Matud niya nga nakadayeg siya sa kapolisan sa Talisay sa ilang subsob nga kampaniya batok sa ilegal nga drugas ug uban pang krimen.

Iyaha usab gisaway ang mga namasangil nila ni Recamara tungod kay imbes nga sila dayegon gihasi na hinuon kini ug gigamit pa ang media sa maong buhat.

“These two deserves commendation worthy to emulate by fellow PNP officers, instead of ridiculed….. It is precisely these two honest to goodness act against these elements and persons that they are now being harassed and charge by publicity using media, for them to stop their fight and as part of their revenge and vendetta, without executing a notarized affidavit and proof of wrongful act as charge,” tipik sa suwat ni Bautista.

“It is unfair and unjust for chief Recamara and Lofranco, for their reputation to be tarnished by the media by questionable elements out to sow intrigue and trouble in the PNP organization,” dugang pa niini.

Ang maong suwat dunay petsa nga Hunyo 7, 2012 ug nahagbong kini sa koreyo niadtong Hunyo 11, 2012.

Si Recamara sa iyang bahin nga nahinabi sa mga tigbalita kagahapon nagkanayon nga ang maong suwat nadawat niya niadtong Miyerkules ug nagtuo siyang reklamo lang kini nga gipadangat ngadto kaniya.

Matud sa hepe nga wala siya magdahom nga duna diay mga tawo nga nakakita sa ilang mga gihimo ug midayeg kanila, di unta niya kini ipublikar apan buot niyang mabasahan kini sa mga nanaot kanila.

“Although usa lang na ka tawo, nalipay ko nga dili diay tanang tawo nga madala sa isyu. Duna pa diay tawo nga nag-observe nga nag-istorya nga tarong sab, pabor sab, nalipay ko….Kay sa ang imong kanunay’ng huna-huna nga ang tanang tawo magduda na lang gyud nimo makaingon ka nga trial by publicity na lang gyud ka..ingon ana diay ka intelihente ang mga tawo diri nga tanang butang dili lang sa akoa nagkinahanglan pa diay nga imbestigahan pa tungod kay dili tanang tawo naniniwala,” ni Recamara pa. (/EIM)(BANAT NEWS)