NDRRMC may pasidaan tungod ni Butchoy

CEBU, Philippines - Nagpasidaan ang National Disaster Risk Reduction and Management Council sa tanang mobiyahe sa dagat sa paghiklin una tungod sa peligrong posibleng dinala sa pagsulod sa bagyong Butchoy (Guchol) dinhi sa teritoryo sa Pilipinas kagahapon.

Sa report sa GMA News.online, gipasidan-an sa NDRMMC ang mga dapit sa Eastern Visayas area. Si NDRRMC head Benito Ramos miapelar usab sa mga bus pasaheroan nga mobiyahe sa Samar nga kanselahon lang una ang ilang biyahe tungod kay posibleng ma-stranded lang unya ang mga pasahero tungod sa landslides ug baha.

Matud pa niya kung dili importante ang lakaw mas maayong di nalang modayon, apan kung importante magdala gyud og dugang kwarta tungod kay posibleng matanggong sila.

Lakip sa gipasidan-an ni Ramos mao ang mga mananagat sa sidlakang bahin sa nasud nga kinahanglang mobalik sila sa kabaybayunan sa labing madaling panahon, ang NDRRMC naa na karon sa blue alert aron masigurong duna kini hustong sakop nga matawag kung gikinahanglan.

Ang mga dapit nga giingong posibleng maapektohan ni Butchoy mao ang Surigao, Agusan, Bukidnon, Cagayan de Oro ug Iligan City ug kinahanglang mangandam sila niini.

Lakip sa gipasidan-an mao ang mga lokal nga kagamhanan sa Compostela Valley ug Surigao del Norte bahin sa landslides. Malaumon si Ramos nga nakat-on na sa mga nanglabay’ng trahedya ang publiko ug makapanagang nang daan karon.

Ang Philippine Atmospheric Geophysical and Astronomical Services Administration (PAGASA) mipahibalong layo pa kaayo sa mga isla sa Pilipinas si Butchoy apan atol ning pagsulat sa balita gipaabot nga mosulod na kini sa teritoryo sa Pilipinas kagahapon sa hapon o ba kaha sa gabii.

Sa uwahing weather bulletin sa Pagasa dunay 85 kph ang gikusgon ni Butchoy.

(BANAT NEWS)