CEBU, Philippines - Gitabang sa mga pulis ang usa ka babayeng bilanggo sa detention cell sa Cebu City Police Office (CCPO) kagahapon sa buntag human kini kalit nga nakuyapan tungod daw kay dili na masingo ang kabaho sa maong pasilidad.
Rason sa maong babaye nga wala siya makaagwanta sa kabaho sulod sa detention cell maong kalit siyang nakuyapan apan sa dihang gidala na siya sa mga pulis paingon sa buhatan sa Investigation and Detective Management Branch (IDMB) namatikdan nga kusog kini kaayong naglakaw. Dunay nagtuo nga nagpasumangil lang kini sa pagpakuyap-kuyap.
Si Glizel De Claro, 27, alyas Donabelle Ardiente ug Jacky Chua, residente sa sitio San Roque sa barangay Mambaling ning siyudad, nadakpan niadtong Miyerkules sa hapon sa duha ka security officer sa Globe Telecommunications sulod sa usa ka inilang department store diha sa North Reclamation Area sa barangay Mabolo.
Siya gidakop tungod sa paggamit og alyas sa iyang pag-apply og plan sa Samsung nga cellphone gikan sa maong kompaniya. Giingong migamit sa pangalang Jacky Chua si De Claro sa sangang buhatan sa Globe sulod sa E-Mall apan kini gi-deny, pagkahuman niini miadto kini sa laing branch sa Globe diha sa usa ka department store sa North Reclamation Area ug misuway gihapon sa maong modus operandi apan nabantayan na kini ug gidakop.
Ang suspek nga gikuhaan og reaksyon sa mga tigbalita kabahin sa pasangil nagdumili paghatag niini ug miingon lang nga ang makatubag sa mga pangutana mao lamang ang iyang abogado. Ang maong telecommunication company kanunay nang mabiktima og susamang modus operandi diin mogamit og alyas ang suspek ug kun makuha na ang unit dili na kini mobalik pa. (/EIM)(BANAT NEWS)