CEBU, Philippines - Si Mayor Paz Radaza sa dakbayan sa Lapulapu mipasalig nga mohatag og hinabang sa pamilya sa kawani sa lokal nga kagamhanan nga gipatay sa mga tulisan sa miaging kaadlawon.
Matud pa ni Radaza nga gipahikay na niya ang paggahin sa maong hinabang kang manlalaban Michael Dignos alang kang Francisco Alicer nga nagtrabaho isip driver sa Mactan North Reclamation Development Project.
Si Alicer nagsakay sa iyang motorsiklo sa miaging Lunes sa kaadlawon paingon sa Marigondon kauban sa usa ka babaye dihang pag-abot nila sa maong barangay gilabni sa wala hiilhing mga tulisan ang bag sa angkas niyang babaye.
Tungod sa pagdumili niini paghatag sa iyang bag, gipusil sa mga tulisan ang babaye apan si Alicer maoy naigo.
Nasabak siya sa bala sa dapit sa iyang gusok ug dead on arrival siya sa pag-abot didto sa tambalanan.
Padayon pang gipangita sa kapolisan ang mga tulisan. (BANAT NEWS)