Ulo sa ulitawo nabuslot sa bala

CEBU, Philippines - Nabuslot ang ulo sa    usa ka drug addict human kini  pusila sa wala hiilhing kriminal samtang natulog sa lantay sa barangay Canyuco, sa lungsod sa Dumanjug kagahapon sa ala 1:00 sa kaadawon.

Ang biktima mao si Apolo Pescadero Macario, 43, ulitawo nga nagpuyo sa maong lugar.

Si SPO1 Joselito Abella sa Dumanjug Police Station mibutyag sa Banat News nga niadtong Martes sa alas 10:00 sa gabii ang biktima mitambong og disko   sa barangay Minolos, lungsod sa Barili nga nagsaulog sa ilang pista.

Apan ang biktima nga nailado sa iyang pagka-drug addict giingong gitabangan og kulata sa mga estambay kay nagpunay og pangilkil sa mga tawo sa piryahen sa maong lugar busa mipauli kini ngadto sa balay sa iyang igsoon nga si Irene Macario ug didto nakatulog sa lantay sa gawas sa balay. Apan matud pa nianang ala 1:00 sa kaadlawon mao nalay nabati nila ni Irene ang sipa kaayong buto sa armas de fuego ug dihang gisusi   niini ang gigikanan sa buto maoy misugat sa iyang panan-aw ang nagbuy-od niyang igsoon nga patay na sa lantay nga gihigdaan niini.

Maayong pagkasabak sa ulo sa biktima hinungdan nga nabuslot sa bagolbagol niini agi sa bala nga maoy hinungdan sa hinanali niyang kamatayon.

Padayon pang gipangita sa kapolisan ang mga kriminal. (BANAT NEWS)