Computers sa suspendidong internet café sakmiton

CEBU, Philippines - Ipaamendar sa Konseho sa dakbayan sa Lapulapu ang ordinansa nga nagdili sa mga tinun-an nga mosulod sa mga internet café sa oras tingklase ug buot nilang iapil sa silot ang pagsakmit sa mga computer units sa mga badlungong operators niini. Si Lapulapu City Secretary Rolando Duero atol sa pakighinabi sa Banat News miingon nga daghang suspendidong internet cafés sa dakbayan sa Lapulapu nga nagpasulod og mga bata bisan sa oras sa tingklase.

Ang siyudad sa Lapulapu adunay City Ordinance 363-2006 nga nagdili sa mga internet cafés pagpasulod sa mga bata gikan sa alas 7:30 sa buntag hangtud alas 4:30 sa hapon.

Si Lapulapu City Mayor Paz Radaza nagtinguhang pabug-atan pa ang silot ug hasta ang mga tinun-an sa night high schools did-an usab makasulod kay himuon na ang ordinansa kutob sa alas 10:00 sa gabii. Tungod kay duna gihapoy mga suspendidong internet café nga suspendido apan padayong nag-operate, buot sa mayor nga sakmiton ug ideposito una ang ilang mga computer units sa siyudad ug ibalik lang kini human sa suspensyon.

Sa pagkakaron dunay suspendidong 12 ka internet café sa dakbayan sa Lapulapu apan nasuta nga sekreto gihapon silang nag-operate pinaagi sa pagbalhin og laing lugar ug ang uban migamit og laing pangalan.

Ang kasamtangang ordinansa dunay tulo ngadto sa unom ka bulang suspensyon sa business permit sa una ug ikaduhang kalapasan, samtang kanselahon ang permit sa ikatulong kalapasan.

Si Lapulapu City schools division superintendent Eduardo Ompad mihangop sa maong kalamboan aron matutukan sa mga tinun-an ang pagtuon samtang gimandoan ang mga magtutudlo paghatag og suwat permiso ngadto sa mga tinun-an aron dunay ikapakita sa internet café operators kun duna silay i-research. (BANAT NEWS)