CEBU, Philippines - Usa ka 30-anyos nga lalaki ang gipusil patay sa higala sa iyang gikalalis sa miaging hapon diha sa sitio Ponce sa barangay Carreta ning siyudad sa Sugbu.
Si Godly Colina Inting, 30, alyas ‘Suya’ nakabsan sa iyang kinabuhi pipila ka gutlo human siya gitabang sulod sa Cebu Doctors Hospital tungod sa samad pinusilan sa dughan.
Padayon pang gipangita sa kapulisan ang nakaikyas nga si Danilo Alcachupas, alyas ‘Dangi’ nga molupyo sa maong lugar.
Sa pasiunang imbestigasyon sa grupo ni SPO4 Rey Cuyos sa Homicide Section nagbutyag nga naglakaw ang biktima dihang iyang nasugatan ang suspek ug sa walay igong hinungdan gipusil kini og pugakhang.
Si Leame Duarte Matibagon,18, kapuyo sa biktima mitug-an sa kapulisan nga sayo nianang adlawa gikalalis sa biktima ang ginganlan og ‘Opaw’ kabahin sa ilegal nga drugas nga shabu.
Si Pablito Anora, tanod sa maong lugar maoy mipatunga sa lalis tali sa biktima ug ni Opaw ug nahunong ang lalis apan giingong gipalit sa suspek ang away ug gipusil ang biktima.
Nakuhang mga ebidensya sa Crime Scene Investigation Unit (CSIU) ug Homicide Section ang pugakhang nga may upat ka buhing bala sa shotgun. (BANAT NEWS)