CEBU, Philippines - Patay ang 15-anyos nga batang lalaki nga biktima sa pagpamusil sa duha ka tawo nga nagsakay og motorsiklo sa sitio Kalubihan sa barangay Pajac, dakbayan sa Lapulapu sa miaging hapon.
Si PO1 Bregido Paca sa Homicide Section sa kapolisan sa maong dakbayan nga nahinabi sa Banat News miingon nga naglingkod sa basketbolan ang biktima dihang kini gihunongan sa duha ka batan-ong luwan og motorsiklo ug gipusil kini.
Human niini daling mipabulhot ang mga mamumuno ug wala na maabti sa mirespondeng mga polis.
Matud pa ni Paca ang biktima naigo sa ulo ug dughan ug gidala sa Mactan Doctors Hospital apan gideklarar kining patay na.
Si Paca miingon nga si Noli Castillo nga amahan sa biktima nga ilang nahinabi mitug-an nga adunay kasong pagpangawat pipila ka bulan na nakalabay ang iyang anak apan wala kini mapriso tungod sa edad. (/EIM) (BANAT NEWS)