CEBU, Philippines - Tungod sa kapakyas sa manglabnihay nga makuha ang bag sa nag-angkas sa motorsiklong babaye gipusil niini ang drayber hinungdan sa pagkabalintong sa duha niadtong tungang gabii sa Hawaiian Village sa barangay Marigondon, sa dakbayan sa Lapulapu.
Ang namatay mao si Francisco Alor Alser, 29, taga sitio Soong 1, barangay Mactan, dakbayan sa Lapulapu ug kapuyo ni Lady Millora nga mao untay gilabnihan sa backrider nga snatcher.
Si PO1 Bregido Paca sa Homicide Section sa kapolisan sa maong dakbayan miingon nga padulong na pauli ang mga biktima luwan og motorsiklo apan paglabay nila sa nahitabo kalit silang giabayan sa tulo ka mga lalaking nag-angkasay sa usa ka motorsiklo.
Dihang nakapaduol ang motorsiklo sa mga biktima kalit nga gibira sa usa sa mga backriders ang bag ni Millora apan wala kini makuha tungod kay hugot ang paggunit niini sa bag.
Sumala pang Paca nasuko og maayo ang mga snatcher ug wala lung-i ang mga biktima paggukod hangtud nga gipusil sa usa sa mga backrider ang ulo ug bukobuko ni Alser hinungdan sa pagkalamba sa mga biktima.
Human niini daling mipabulhot og padagan ang mga gikatahapan ug wala na punita og dayon ang bag ni Millora matud pa sa kapolisan.
Ang duha gitabangan sa mga tawo ug gidala sa Mactan Doctors Hospital apan namatay si Alser samtang naputos ug bun-og ug mga pangos sa kalawasan si Millora. (BANAT NEWS)